نوسینەوەی خود———- ژن

تكلمي

, وتار

نامق هەورامی//

ئیزنت لێ وه‌رده‌گرم،ئه‌مه‌ نه‌ریتێکه‌ ته‌نیا خۆم پێی سه‌رسامم ،هه‌روه‌ها ژنانیش، کام ژن؟ جه‌وهه‌ری پرسه‌که‌ی من ئه‌مه‌یه‌؟ کائینێک به‌رده‌وام له‌ژێر گوشاری ئایدیا و مه‌زهه‌بدا،کۆمه‌ڵگه‌و پیاویش شه‌ریکه‌ به‌شی ئه‌م گوشاره‌ن.
راستی بڵێ، ئه‌گه‌ر بریسکه‌ی شمشێر ئاو له‌ چاوان بێنێت،مه‌زنی له‌وه‌دا نییه‌ فۆرمت رازاوه‌و ناواخنت وێرانه‌ بێت ،چ فایده‌ که‌ دکتۆر بیت، لێ ناخت پڕله‌ بیماری وژانی جه‌هاله‌ت بێت؟
ره‌نگه‌ لێم بپرسیت بۆچی ژنت خۆشده‌وێت ؟ له‌وه‌ڵاما پێت ده‌ڵێم له‌قار باوکەکانم!
زریکه‌یه‌ک که‌تا ئێستا له ‌داڵانه‌کانی مێشکما ده‌رناچێت ،زریکه‌ی ژنێک بوو به‌خواستی باپیرم بووبویه‌ دایکم ، زریکه‌یه‌ک له‌قوربانییه‌کی به‌رده‌ست جه‌لاده‌که‌ی ده‌چوو، ئه‌وه‌ هاواری دایکم بوو کاتێک باوکم به‌ دارێکی مازووی سه‌رخڕ کڵاوه‌ی ئه‌ژنۆی شین کرده‌وه‌!!
که‌متر له‌پیاوانی ئه‌م مه‌مله‌که‌ته‌ توند و تیژیم کردووه(ئه‌وه‌ش سه‌رمایه‌یه‌کی گه‌وره‌ی ویژدانمه‌) ئه‌مه‌ پاکانه‌ کردن نییه‌ بۆ خود،خۆشه‌ویستیم بۆ ژن جیا له‌ پیاوانی تره‌ هه‌ر بۆیه‌ش زۆر جاران به‌ ژنانی ناوزه‌د کراوم که‌به‌لای منه‌وه‌ میداڵی شانازیمه‌ ،ده‌مه‌وێت باجی ئه‌و هه‌ڵه یه‌ بده‌م که‌ باوکەکانم کردیان…
پیاوانی ئێره‌ له‌چاوی هاملێته‌وه‌ له‌ خۆشییه‌کانی ژن ده‌روانن و به‌ (ئۆفیلیا)ده‌ڵێن؛ شتێکی خۆشه‌ له‌نێو هه‌ردوو ڕانی ژنێکدا پاڵ بده‌یته‌وه‌!!
ئه‌مه‌ سانایه‌ کاتێک وابزانیت له‌گه‌ڵ مرۆڤدایت و له‌ناو گه‌ڵی مرۆڤدای ،بۆ نا؟
هه‌مو شتێک به‌ جه‌سته‌ی مرۆڤه‌وه‌ ئه‌ندامه‌، ئه‌م ئه‌ندامانه‌ سروشتی کاری خۆیان ده‌که‌ن ، له‌ ڕۆژهه‌ڵاتدا ئه‌ندامه‌کانی له‌ش توشی هه‌مان ئیفلیجی و سه‌قه‌تی هاتوون که‌ ئه‌ندامانی گروپ و رێخراوه‌ میلیتارییه‌کان تووشی هاتوون ، ئه‌ندامگه‌لێکن سۆز ده‌یان جوڵێنێت نه‌ک ئاوه‌ز.
ئه‌ی ژن.. ئاره‌زوومه‌ پڕبم له‌ ئاهو ئۆفت به‌ڵام له‌کاتی ئۆرگازمدا نه‌ک له‌کاتی لێدانتدا..
جیاواز له‌ په‌یکه‌رتاشه کانی یۆنان ،نامه‌وێ هه‌موو شته‌کانم بخه‌مه‌ نێو جه‌سته‌ی به‌رده‌وه‌ ئاخر جه‌سته‌ی ئافڕێنه‌ر نابێت له‌ به‌رددا ته‌جسید بکرێت .
ته‌نانه‌ت ئه‌وانه‌ی په‌یکه‌ری خواوه‌نده‌کانیشیان له‌به‌رد و دار ده‌تاشی نه زان بوون یان ئه‌شقیان بۆ خواوه‌نده‌کانیان نه‌بوو!!
سارای بێخودایی سه‌رزه‌مینێکه‌ ژنی تێدا نییه‌،یان دڵی ژنی تێدا ده‌شکێت،ئه‌مه‌ شتێکه‌ له‌ مندا گه‌ره‌کیه‌تی وه‌ده‌نگ بێت ،نورێک هه‌رگیز خه‌فه‌ نابێت،ئه‌مه‌ سروودێکی ئیلاهییه‌،ژنێک ئاوازی له‌بولبول بۆ قه‌رز کردووه‌، من شه‌وانه‌ گوێ له‌و سروودانه‌ ده‌گرم ،به‌ مه‌ستی ده‌یانڵێمه‌وه‌ (منی خۆم )و (منی تۆ) دار ده‌چێنین ،چیمه‌نی جه‌سته‌کان ئاو ده‌ده‌ین ،بۆ رۆشنایی ئاگره‌که‌ سه‌ما ده‌که‌ین ،ئه‌مه‌ ته‌قسێکه‌ له‌ زه‌رده‌شته‌وه‌ وه‌رگیراوه‌ ،(ساتێکی ئارام بوو قسه‌م له‌ ڕووناکی ده‌کرد،له‌پڕ رووناکی ماڵاوایی کرد- کاره‌با بڕا)
نازانم ده‌مویست له‌چی بدوێم، کیشوه‌رێک گه‌وره‌تر له‌وه‌ی کۆڵۆمبس دۆزییه‌وه‌، تریفه‌یه‌ک جوا‌نتر له‌وه‌ی ئارمسترۆنگی پێگه‌شت،ئه‌گه‌ر له‌تیف هه‌ڵمه‌ت ڕێگه‌م بدا به‌ ڕاشکاوانه تر بدوێم بێگومانم له‌وه‌ی ئه‌گه‌ر ئارمسترۆنگ بیتوانیایه‌ بگاته‌ دڵی ژنێک نه‌ده‌گه‌شته‌ دڵی مانگ!!!
دڵ له‌ پێناسه‌کانی ئه‌حیادا وا باسکراوه‌ که‌ پارچه‌ گۆشتێکی ڕیشاڵییه‌ له‌شێوه‌ی هه‌رمێدا ، ئه‌وه‌ ترومپایه‌که‌و هیچی تر.. ئه‌وه‌ی کانگای سۆز و ئه‌وینه‌ شتێکی تره‌ پێی ده‌ڵێن (زێڵ) وشه‌یه‌که‌ له‌فه‌رهه‌نگی زمانی ئێمه‌دا خه‌ریکه‌ له‌به‌ین ده‌چێت ، (زێڵم نمێ) (زێڵیت نه‌سۆچۆ) ( زێڵ که‌را رۆشن) له‌ هه‌ورامانا به‌کار دێن، له‌گه‌ڵ ئه‌وه‌شدا (دڵ) یش به‌کار دێنن ،لێ به‌ مانای دڵ که‌ ترومپایه‌ نه‌ک کانگای ئه‌وین.
زێڵ جوگرافیایه‌که‌ تائێستا هیچ یه‌که‌یه‌کی پێوانه‌ نه‌یپێواوه‌،ته‌نیا که‌سێک لێی ده‌گات که‌ ماڵۆچکه‌یه‌کی تێیدا هه‌بێت.
له(‌ ڤیدا) ی کتێبی پیرۆزی هیندۆسه‌کاندا و له‌زمانی(پوروڕه‌ڤا)ی داناوه‌ ده‌ڵێت؛ئه‌ی ژن با بۆ ماوه‌یه‌ک له‌گه‌ڵ وته‌ شیرینه‌کانتا بمێنمه‌وه‌،یاده‌وه‌ری ئه‌و گفتوگۆیانه‌ی نێوانمان ده‌بێته‌ سه‌رچاوه‌ی شادومانی بۆ ڕۆژانی داهاتووم،شادیم چنگ ده‌که‌وێت لێیانه‌وه‌.
به‌شه‌رییه‌ت به‌ڵایه‌کی گه‌وره‌ی به‌سه‌ر دێت،به‌ڵای بێزاربوون،چاکه‌که‌ران ده‌بنه‌یاساوڵی بێزراوه‌کان،ده‌هۆڵ وه‌بن ده‌سان ده‌نێن و زوڕنا له‌ له‌خامه‌یان و ئاهه‌نگی مه‌رگ ده‌گێڕن، ئوفتاده‌یه‌ک له‌نێوخه‌ڵکه‌که‌ ڕابوو ،ئه‌وه‌ چییه‌ ئه‌مه‌ خۆشترین زه‌ماوه‌نده‌، مردنی کچه‌که‌تان واته‌ کرانه‌وه‌ی ده‌رگای ڕووسووری و سه‌ربه‌رزی!!!!!!
لێره‌ هه‌مو شته‌کان ته‌واو ده‌بن، شته‌کان وه‌کو یه‌کن،هه‌موویان به‌تاڵن،ئیدی ته‌مه‌نی ئه‌م شه‌وه‌ هه‌زار ساڵه‌یه چۆن کۆتایی دێت؟‌

چه‌نده‌ به‌ حه‌وادا چوون ،هێنده‌ش به‌ قووتا،ئه‌سپی سه‌رکێش و هێسری چه‌موشی لێده‌به‌سنه‌وه‌،ئه‌یانه‌ هانه‌ به‌ر مێژووه‌وه‌ ، وه ل چوار وه‌رزه‌ی ساڵا سه‌رسه‌ختی ده‌که‌ن،وه‌لێ بایه‌ک ده‌یانخاته‌ سه‌ما ، ئه‌بێت له‌و ڕاستییه‌ بگه‌ین ..
که ‌به ‌کۆڵانه‌ کراوه‌کاندا‌ گوزه‌ر ئه‌که‌ین پڕین له‌ داخران،ڤاڵایی ده‌بێته‌ ته‌وته‌م،
گه‌وره‌ترین تاوان به‌زه‌ییه‌ ،خۆلادانه‌ له‌ ویژدان به‌که‌م زانینیه‌تی.
باخچه‌ی ماڵه‌کان پڕده‌که‌ین له‌ گوڵ ،شعوری ژنانیش له‌ برین،ئینجانه‌کان به ‌گوڵ پڕده‌که‌ینه‌وه‌ ،دڵی ئه‌وانیش به‌تاڵ ده‌که‌ینه‌وه‌ له‌ سۆز،رێز..وووووووو
با په‌رژینی باخچه‌کان بشکێنین ، ڕێ له‌شالوره‌کان نه‌گرین با سه‌ردانی باخچه‌ بکه‌ن ،لێ ئاژینی باخچه که‌‌ی من قاییمترو قاییمتر که‌ن ،من یاسای هه ڵگرتنی په‌رژینه‌کان دائه‌ڕێژم ،لێ باخچه‌ی من ناگرێته‌وه‌!!!
میهره‌بانترین باخچه‌ .. چۆن حاڵیت که‌م من له ‌نه‌سلی باخه‌وان و یاساچی نیم،من هه‌ر خۆمم، فێری گیانقورسی نیم..ئه‌مه‌وێت له‌ده‌ره‌وه‌ی ئه‌وان ماڵێک چێکه‌م دوور له ‌یاسای به‌رز و نزم، ده‌مه‌وێت ستران بچرم ،بۆ ئه‌وه‌ی گۆرانی بڵێیت پێوێستت به‌ وچانێکه‌ ،با لای تۆ وچانێ بده‌م ،تۆش ده‌توانی پێم بڵێت نا.
به‌رله‌وه‌ی سوکنایی بگرم ،پێش گه‌ڕانه‌وه‌م بۆ ناو تۆ ،بیرم که‌وته‌وه‌ ،شاهه‌نشاکان بێزار ده‌بن کاتێ گوێیان له‌ (نا) ده‌بێت،بۆ ئه‌وه‌ی موعجیزه‌ بخولقێت من ده‌ڵێم (نا) ،بۆ ئه‌وه‌ی نه‌مریت هه‌میشه‌ (نا) بڵێ..
له‌به‌رامبه‌ر هه‌موو (ئا) یه‌کدا (نا)یه‌ک بڵێ ،بابزانن تۆش هه‌یت ،هه‌مان پیاڵه‌ مه‌به‌ که‌ دانایه‌ک و گه‌مژه‌یه‌ک وه‌ک یه‌ک تیاتدا بخۆنه‌وه‌ ..
ئێسته‌ واده‌ی گۆرانی وتنه‌ ، وه‌ره‌ با گۆرانی ئینسانی بڵێین ئه‌ی ژن……

اترك رد