Takalami | تكلمي

لە بەسرە بەکارهێنانی ماددە هۆشبەرەکان زیادیکردووە

سه‌میع زوبێر//


لە بەسرە بەکارهێنانی ماددە هۆشبەرەکان زیادیکردووە، بەڕێوەبەرایەتی بەرەنگاربوونەوەی ماددە هۆشبەرەکان دەڵێ ژمارەی بەکارهێنەران و تەنانەت ژمارەی بازرگانان بەم ماددانە رووی لەزیادیکردووە.

پزیشکێکی پسپۆری دەروونی ئاشکرایدەکات بڵاوترین ماددە کە لە بەسرا بەکاردەهێنرێت ماددەی کریستاڵی مێت ئەمفیتامینە، کەماددەیەکی دەروونچالاککەرە، لەڕێگەی هەڵمژین یان بەشێوەی دەرزی بەکاردەهێندرێت و کاریگەرییەکەی بۆماوەی 8-24 کاژێر بەردەوامدەبێت.

پۆلیسی پارێزگای بەسرە دەڵێت لە سێ ساڵی رابردوودا ژمارەی بەكارهێنەرانی ماددەی هۆشبەر زیادیكردووە. بەڕێوەبەرایەتی بەرەنگاربوونەوەی ماددە هۆشبەرەكانیش لە بەسرە لە ساڵی 2014 لە نووسینگەیەكی بچووكەوە كە تەنیا 15 پۆلیس و ئەفسەرێكی هەبوون، فراوانكراوە و ئێستا 195 سەرباز و 17 ئەفسەری هەیە، بڕیارە بەمنزیكانەش 85 پۆلیسی دیكە بگوازرێنەوە بنكەكە.

بە هۆی بەرزبوونەوەی ژمارەی ئالودەبووان و بازرگانانی ماددە هۆشبەرەكان، ساڵی رابردوو دوو هۆڵی دیكە بۆدەستبەسەركردن دروستكراون.

لیوای عەبدولكەریم موستەفا مزعل، فەرماندەی گشتی پۆلیسی پارێزگای بەسرە روونیدەکاتەوە: “ساڵی رابردوو زیاتر لە سێ هەزار بەكارهێنەری ماددەی هۆشبەر و 1450 بازرگانانی ماددە هۆشبەرەكان دەستگیركراون، بەڵام لایەنەكانی جێبەجێكردنی یاسا بەتەنیا ناتوانن كۆتایی بەو كێشەیە بێنن، پێویستە ئەوانەی ماددەی هۆشبەر بەكاردێنن دەستگیرنەكرێن، بەڵكو دەبێ رەوانەی سەنتەری چارەسەركردن بكرێن، بۆ ئەوەی جارێكی دیكە ئامادەبكرێنەوە و بگەڕێندرێنەوە نێو كۆمەڵگە”.

بەمزوانە سەنتەرێكی 40 قەرەوێڵەیی تایبەت بە دەرووندروستی و دووبارە ئامادەكردنەوەی ئالوودەبووان لە شاری بەسرە دەكرێتەوە، هاوكات ئەو پزیشكانەی لەو پارێزگایە چارەسەری ئالودەبووان دەكەن دەڵێن زۆرترین رێژەی بەكارهێنەرانی ماددەی هۆشبەر، جۆری كریستال لە عێراق لەپارێزگای بەسرایە.

پسپۆڕێكی دەروونی بەنێوی نەزهت نەجم دەڵێت: “لەبەسرە زۆرترین ماددەی هۆشبەر لەڕووی بەكارهێنان مادەی كریستاڵە، لەگەڵ ئەوەش رێژەكە زۆر نییە، بەڵام وەكو مادەی كریستاڵ ئەگەر هەموو عێراق وەرگرین لە باكوورەوە تاوەكو باشوور 62%ـە، كۆی بەكارهێنەرانی ئەو ماددەیەش لە پارێزگای بەسرایە، بێگومان وەكو بازرگانیكردن بەو ماددەیە بەشێوەیەكی فراوان بڵاوبووەوەتەوە، بەڵام وەكو بەكارهێنەران زۆربەی ئەوانەی دێنەلامان رێژەیەكی زۆریان ماددەی كریستاڵ بەكاردێنن، ئەوانەی دیكەش ترامادۆڵە و رێژەیەكی كەمیش حەشیشە، خواردنەوەی كحولی زۆركەمە، نزیكەی 2 هەزار گەنجی تەمەن نێوان 15 ـ 30 ساڵ ماددەی كریستاڵ بەكاردێنن.”

چالاكوانان و بەرپرسانی حكومی دەڵێن بەرزبوونەوەی بەکارهێنانی ئەو ماددەیە لە عێراق بەهۆی سنوورەكانەوەیە كە ئاسایشی تێدا تۆكمە نییە. چونکە ئێران و كوێت هاوسنوورن لەگەڵ پارێزگای بەسرە و ماددەی هۆشبەریش لەو دوو وڵاتە زۆر بڵاوە، هەروەها بەسەر تاکە دەروازەی عێراقیش دەڕوانێ‌ لە كەنداوی عەرەبی كە كەلوپەلی بازرگانی تێدا دێتە نێو عێراق، ئەمەش دەرفەتی قاچاخچیەتی زیاتر دەكات، تاوەكو ئێستاش هێزە ئەمنییەكان بڕێكی زۆری مادە هۆشبەرەكانیان لە بەندەرەكانی بەسرەو رێڕەوە سنووریەكان دەست بەسەرداگرتوە.

پێداچوونەوە: هونەر رێبوار
سه‌رچاوه‌: رووداو- هەولێر 

اضف تعليق

اترك رد

تسجيل الدخول

تابعونا